Nos Everhardus comes de Marcha notum facimus universis presentem litteram inspecturis, quod habito consilio amicorum et officialium nostrorum contulimus quibusdam civibus in Büchem areas et casas qualescumque attinentos curie nostro ibidem sub hereditaria pensione, quod vulgariter dicitur ervethinsguth, perpetuo possidendas tali conditione, quod quilibet presentabit pensionem suam statutam sculteto curie nostre ibidem singulis annis dominica proxima post festum Martini episcopi, scilicet casa illa, que vocatur domus cauponis, super forum tres libras cere et tres pullos; item domus Alberti super forum tres libras cere et tres pullos; item una casa iuxta domum Alberti super forum unam libram cere et unum pullum; item casa Ottonis et Aleydis alteram dimidiam libram cere et alterum dimidium pullum; item ianua scraconis, que ascendit forum, dimidiam libram cere et dimidium pullum; item domus pileatoris quatuor libras cere et 4 pullos; item domus Marsilii quatuor libras cere et 4 pullos; item domus Alberti carnificis quartam dimidiam libram cere et tot pullos et de uno macello; item domua Godefridi dicti Reyme tres libras cere et tres pullos; item domus comitis iuxta ripam tres libras cere et tres pullos; item domus Goscalci iuxta ripam et de uno macello tres libras cere et tres pullos; item domus Gerhardi preconis alteram dimidiam libram cere et tot pullos; item Bertha relicta de gradu quatuor libras cere et 4 pullos; item Alexander institor alteram dimidiam libram cere et tot pullos; item Gerlacus suus vicinus in foro alteram dimidiam libram cere et alterum dimidium pullum; item super cellario in foro et de sex macellis quatuor libras cere et quatuor pullos; item domus Schepelerschen terciam dimidiam libram cere et tot pullos; item Hildegundis filia pugilis de duobus macellis et de una casa terciam dimidiam libram cere et tot pullos; item Ludolfus sartor de una casa alteram dimidiam libram cere et alterum dimidium pullum; item Renerus de una casa alteram dimidiam libram cere et tot pullos; item Johannes iuxta ripam de duobus macellis unam libram cere et tot pullos; item Gertrudis filia Brunonis de uno macello unam dimidiam libram cere et dimidium pullum; item Sesarius dictus op me Campe de uno macello dimidiam libram cere et dimidium pullum. Item adiectum est, quod, si aliquem eorum decedere vel ius suum vendere aliqua necessitate compulsus(!) contingerit(!), ille, qui sibi succedit, dabit sculteto nostro predicto 12 denarios pro iure suo et idem scultetus porriget bona predicta ad manus unius nomine nostro sine aliqua contradictione pro denariis supradictis; item si sepedictus scultetus super premissis articulis aliquid eis infringere vel negare conaretur, quilibet eorum cum duobus suis collegis, qui vulgariter geltchenothe nuncupantur, ius suum vel porrectionem sibi legitime factam poterit probare super hoc prestito iuramento. Ut autem hoc factum ratum et inconvulsum permaneat, presentem litteram fecimus sigilli nostri munimine et sigillis discretorum virorum Gerhardi plebani in Buchem et Gyselberti dicti Speke tunc temporis iudicis nostri ibidem firmiter roborari. Datum anno Domini M°CC° nonagesimo octavo in nativitate beate Marie virginis.